Daily Prayers, Holy Communion and Devotions in Ubir (1920)
Daily Prayers, Holy Communion and Devotions, Form of Confession and Instruction, Etc. in the Ubir Language, of Wanigela, Collingwood Bay, Papua.
Sydney: D.S. Ford, 1920.
Introduction
Ubir is an Austronesian, Oceanic language used in Oro/Northern Province in Papua New Guinea near Collingwood Bay in the Anglican Diocese of Popondota. (Oro/Northern Province is the only province of Papua New Guinea in which Anglican Christianity is the majority religion.)
This translation of Anglican liturgical material was printed in Australia in 1920 when the former Diocese of New Guinea was administratively part of the Church of England in Australia. Ubir was one of the four major Papuan languages used by local Anglican missionaries in the early twentieth century, along with Binandere, Maisin, and Wedau. The State Prayers include intercessions for King George V in his role as King of Australia.
This text was digitized by Richard Mammana in September 2015 from a personal copy of the original.
FOMENE BA YOI.
¶ E safur, rakaita nunuanai nab e tein e au:
Duran Taman aurin, On i foureu.
Duran Natun aurin, Ou i sabarueu.
Duran Ayn aurin, On i kakafeu.
Trinity Usinkakafotin Tutufin on baimomogin atoari wantoan ba.Ire emon e misir e au:
Bada Jesu Keriso wabinai a misir. In momogineu, i n binafafareu, i n iaiwabiu, au yawas wantoan i n boeu.
Bayoi.
+ Taman, Natun, Ayu Usinkakafotin wabisi. Amen.
TAMAI safamaie mama on, Wabim se kakafai, Am baiawab e nat, Am gogoi se four tafanamai safamai nanaba, Atoari ai rara siu e itei, Ai bokakaf auris e iboboni, maragan auri se bokakaf on a b ibobonis, Au rutobon abi e nanawafi, Ab komas emon e nafafarei. Amen.
Baitutum an four.
Au God a bitutumim, Am Ekalesia dur engon ba, Om u au nana, Am dur maiauwin, on aurin.
Baiamar an four.
Au God, aurim a biamar, yawataf duran aurin, Am aumatan, kaber, faiwar mes.
Bosisir an four.
Au God, Om momogin maiau, on aurin nunuau engonai a bosisirem, a ti iagirem fufu.
Yam bakitabir an four.
Au God, Om momogin maiau, on aurin aurim a bokomas yau i komas, men a t bokomas men, e ibaisiu.
God; tamau, ayou, e bi momogines.
God; tutuai, rorobi, tuturai ebi momogines.
God; bi momogineu, fifi obin e foureu.God an angel, am kaifar aurin God an moa-obinai a ma, e nanawaieu, e tagawaieu, atorai bokomas baban emon ba e binafafareu.
FOMENE KWARER (7777)
Safam on i didibor,
Uniu a n tibogae;
Kiviu se kwarer mom,
Yau a misir a n bayoi.Jesu, rakaita namon
Om aurim a n binage,
Nunuauai nab a n tein
Kwafirai mes yau a n tur.Jesu Ayon jeveni
Fafareu mes e au;
Angel fafarotin on
E iafar turau mes.Mary Ayou ato ra
Bisimai yau a ta ma
Weie fom i n nat men
Matafin yau e kaifar.Jesu i n nanawaiei
Mary sesebui
Angels bisi si na ma
Komas abi a n beru. Amen.THE ANGELUS.
Fomene 6 o'clock, aiyet 12 o'clock, rabirabi fom 6 o'clock bell se rab nanaba 1, 2, 3—1, 2, 3;—1, 2, 3;—1, 2, 3, 4, 5, 6, 7, 8, 9; namon sabu engonengon memenan se mama nanaba si n bayoi.
+ TAMAN, NATUN, AYU USINKAKAFOTIN WABISI. Amen.
1. Bada an Angel Mary aurin i auurai: Ayu Usinkakafotinai i sisiar.
Oro Mary! God yawataf i bonuim, om mat I ma. Jever basusi om baimomogin, yam uan baimomogin Jesu min. Mary usimkakafotim Jesu Ayon, bokomasoti auri e bayoi, atoari rabob an rai ba. Amen.
2. God an agir-jever e itai; basit auriu am dur nana.
Oro Mary! God yawataf i bonuim, om mat I ma. Jever basusi om baimomogin, yam uan baimomogin Jesu min. Mary usimkakafotim Jesu Ayon, bokomasoti auri e bayoi, atoari rabob an rai ba. Amen.
3. Dur yabin i bi fourai basuti i mimian:
Oro Mary! God yawataf i bonuim, om mat I ma. Jever basusi om baimomogin, yam uan baimomogin Jesu min. Mary usimkakafotim Jesu Ayon, bokomasoti auri e bayoi, atoari rabob an rai ba. Amen.
BADA, wei a bifefeyanim, nunuai auri am yawataf e debur, namon wei, Am Natun Jesu Keriso angel wasag aurin a sagobai, nana An nab baiyababanai ba bobaimisir an durau aurin a t nat, ai Bada Jesu Keriso Kaitaminai. Amen.
Bayoi siu mes. Ainau.
+ Bada ato kebor auri enimomoginai, wei, am agirin aurin ba, ai Bada Jesu Keriso aurin. Amen.
+ Taman, Natun, Ayu Usinkakafotin Wabisi. Amen.
Bayoi sui mes. (Gibui).
+ Ato aurin, An kaber engon auris ba, God Wabin Usinkakafotin e imomoginai e ifain. Amen.
+ Taman, Natun, Ayu Usiukakafotin Wabisi. Amen.
FOM BAYOI.
AU GOD a bi kakaiwim, ato ra aurin u kaifareu, baimomogis engon ba wantoan a bo eb, on mes.
A bokakaf, on aurin, notbur a bi fefeyan, rasomon basit a na four am yawataf e iteu on mes.
Tamai, Safamai, e mama on ... Amen.
AU GOD, bokomas auris nunuai i komas i ituem on aurin; Am yawataf baibaisai a aumatan bag men wantoan a n ituem men, ab a na fourtobon bokomas a n sisiwei, engon komas aurin i nanawaiu ba. Amen.
God; ayou tamau, e bi momogines.
God; tutuai, rorobi, tuturai e bi momogines.
God; e bi momogineu, fifi obin e foureu.GOD an angel, am kaifar usinkakafotin aurin a n mian, God i yeineu, au ratafin nanawain-otin ba e ma, ato fom bokomas beruber engon emon e bi nafafareu. Amen.
FOM KWARER. (Jesu, gentle Shepherd)
Jesu Kaifarotim obin,
Natum e bi momogin,
Womanai nio e mama,
Weie ra i na tom.Ra engon u nanawaiu
A bi kakaiwim on mes
Siu, yokur, u iteu
Au fom bayoi etatam.Beruberai e fareu
Angels ireai e yein
Om kaifet wat u boai nan
Unim menan enir mes.Bokomas engone e notbur
Tuturau e iobis
A na rab namon au safam
E boeu, Om mat nan.+ Airoen obin a bi tein
Imau a bi tafatum
Jesu Wabin on a baton
A enbubur weie. Amen.Ireai e au.
Enbubur mes usiu a enir;
God ayubiu i n kaifar a bayoi!
A ta rab, men a safurin,
Ayubiu God i n boai a bayoai.KOFOFOREN BOTITIWAG MES.
Sabu si gogoi Sunday ai ra ta si n kufoforen Usin tar ba boen mes ainau yas si n bototiwag, asi goai, ai bayoi goai, ai menam menam basit, dur nanaba si n au, ra ruam ai ton aiyet; sindas si na rou si n au.
+ Taman, Natun, Ayu Usinkakafotin Wabisi. Amen.
PSALM XXIII.
BADA au kaifarotiu i ma: abiam men a n sagob on mes.
Masau momoginai enir mes i foureu: sawai nurob-awat i nanawaiu.
Ayubiu i iyawasai: boboaibasit an etai i bobaiateu an wabin aurin.
Ei, rabob gugub kirijajamai a ta bib, komas men a na ber, om yau mat u ma on aurin: am tutuk besi ba se kubainunubiu.
Kem nauui u botitiwag ai ragit nasi: uniu a bi mut uren aurin au vig i dedebur.
Basit baiobin kaber ba i n gibununueu au yawas an rai engon: Bada an goai a mimiam wantoan.Jesu Baimomogim, wei men basit ab auri u nat Sacrament Baionibinai am Usin tar ba min, a katutum a b i fefeyanim, boem mes e botitiwagiu.
Bada, auriu e nat, gumidareu mes:
Bada, auriu e nat, yawasiu mes:
Bada, auriu e nat, faiwariu mes.Bada, e kaberei
Keriso, e kaberei
Bada, e kaberei.Tamai, Safamai e mama on . . . Amen.
Namon nunuam e binabunag.
Am sif engon momogin bait?
Am dur engon momogin bait?
Am nos engon momogin bait?¶ Namon God aurin e bi yatet nana.
GOD faiwarim maiau aurim a yatet, yau a bokomas kwakwau; nosai, durai, boboai ba yau a bokomas [... nin am bokomas engon e baton ...] yau i komas kwakwan. A bi fefeyanim e notbureu e kabereu ai Bada Jesu Keriso aurin. Amen.
Bayoi. God faiwarin maiau i n kabareu + i n notbureu, bokomas engon emon i n nafafareu au yawas i n boeu, ai Bada Jesu Keriso aurin. Amen.
E nos tiwag: Ot nunuati men basit God aurin yoto mes, ab aifan, ab on aifan bat se gayam abi aurin a n yoto. Ainau:—duduran ba God aurin mes, men bayoai mom on a na four. Bairuin:—baikakaiw mes an moan-momogin auris. Baitonin:—ato bokomas baibuburis mes. Baibatin:—yawataf engon, baimomogin fami na boen mes. A gogoi turan matan-i-n-rab, kebor a nuen on itin mes, ab abifan God faiwarin maiau aurin a n itai. A n aurem. O sagob ati Bada Jesu Keriso i rabob ati bokomas mes: gibuiemou rabob emon i misir, au safam i gae, baise tafanamai bisiti i mama, Sacrament Baimomoginai aurit i nat.
Sacrament Baimomoginai ainau Bread Wine ba i yen; baise Bayoi Gagaminin Usinkakafotinai priest dur i au, nanaba ati Bada Jesu Keriso an baiyobob i ibebeyes si t au an Usin obin Tar obiu ba i matar. On min wayo gagamin a yoto ati abiam mes God faiwarin maiau aurin. Bayoiai e katutum, e kwafir, meyan Jesu i nat.
Kufoforen an rai garawat mom au bayoi goa e gat, e bayoi nana.
O au God, yau men basit, fifi ba a ma, e ibaisiu, nunuau engonai a n bayoi, namui a ma.
Bada Jesu Keriso Om u au, "Fifirig auriu si n nat e bitamonagis." Am dur a n kaifar e ibaisiu.
¶ Nio e nos tiwag abifan aurin u gogoi u n bayoi.
Bayoi. Bada, Ayu Usinkakafotin an wairafai nunuai e bi gumidares, yan obinai matafinai a n iagirem, Jesu Keriso aurin. Amen.
¶ Priest aurin e bayoi.
Bada am priest mat e ma, ato wayo an imanai e bo, Wabim duran baifain mes, basit auri ba, Ekalesia Usinkakafotin engon ba. Amen.
KUFOFOREN MES AI BAITAYO USINKAKAFOTIN.
¶ Osi bibiam si n ruruayo ainau asi wabis si n gayam.
¶ Bokomasotin i ma, ai kaita tuturas auris i bokakaf boboai ai durai, Priest on i n sagobai i n rugagarai men au Altar i n nar mes weie yan i ikitabir i iyatet Priest an baimomogin boai mes.
¶ Priest Altar nanai i n tawar dur i n au nana, Bada an Bayoi dur ta ba, sabu sindasi si na ma.
TAMAI safamai e mama on, Wabim se kakafai, Am baiawab e nat, Am gogoi se four tafanamai safamai nanaba, Atoari ai rara siu e itei, Ai bokakaf auris e iboboni, maragan auri se bokakaf on a b ibobonis, Au rutobon abi e nanawafi, Ab komas emon e nafafarei. Amen.
Bayoi.
GOD Faiwarim maiau, aurin nunuas engon si ruseren, baiamari engon rerereb se en sartatan engon aurim men se en baibubuni; Ayubim Uskinkakafotin nunuaii e babainriu, nunuaii a nonosin on e igumidares, wei a t bosisirem bag, Wabim, usiukakafotin a t igegememenal; Keriso ai Badai. Amen.
Agir.
1. GOD atosi dur i baton, i au; Yau Bada am God: men am god tani nauui.
Sabu. Bada e kaberei, nunuai e bogegeren ato baifofor boin mes.2. Agir. Babaiur tatar ai abi magin ba safam aietun e en on, ai tafanam gaburai, ai sareuai tafanam babanai, abi e tatar ai weinem. Abi nasi e tutur, abi e kwakwafires; Yau Bada am God, God a biboboar yau, tatamas asi bokomas fasisi nanatus a bimakies, ratbabaren au baitonin au baibatin eb se b ikusisiweu on, baise thousands se bosisireu on, au baifofor se bobo on, a kakaberes.
Sabu. Bada e kaberei, nunuai e bogegeren ato baifofor boin mes.3. Agir. Bada am God Wabin abi e b iasotob; Wabin e b iasotob on, Bada men iman matafin i n iwab.
Sabu. Bada e kaberei, nunuai e bogegeren ato baifofor boin mes.4. Agir. Sabate ra e nos, e kakafai. Ra nimitereban kaita e bo, am bobo engon e bo; ab ra nimitereban bairuin, on Sabate Bada am God aurin. Abi bobo abi e bobo, om ai natum orot, ai natum jever, ai am agir orot, ai am agir jever, ai am for, ai toman orot am kayawau amonai. Ra nimiterevan kaita, Bada safam tafanam i fouris, kamit engon amosi se mama on eb, ra nimitereban bairuin i iarir: on aurin Bada ra nimitereban bairuin i aubaimomoginai, i kakafai.
Sabu. Bada e kaberei, nunuai e bogegeren ato baifofor boin mes.5. Agir. Tamam ayom e kakafes; nana am ra si n iwereromis tafanamai Bada am God e b item on.
Sabu. Bada e kaberei, nunuai e bogegeren ato baifofor boin mes.6. Agir. Abi e b irabob.
Sabu. Bada e kaberei, nunuai e bogegeren ato baifofor boin mes.7. Agir. Abi e b i regnan.
Sabu. Bada e kaberei, nunuai e bogegeren ato baifofor boin mes.8. Agir. Abi e babainau.
Sabu. Bada e kaberei, nunuai e bogegeren ato baifofor boin mes.9. Agir. Turam abi e kukutabirai.
Sabu. Bada e kaberei, nunuai e bogegeren ato baifofor boin mes.10. Agir. Turam an go abi e babasiai, turam awan, ai an agir orot, ai an agir jever, ai an ox, ai an ass, ai abi turam noan on, abi e babasiai.
Sabu. Bada e kaberei, atosi am dur engon nunuai e gayam men, a bi-fefeya-nim.Ta n bayoi.
GOD Faiwarim maiau, am baiaiwab kikitin, am kututu an farat momo; Ekalesia engon e kaberai; am agir rurubinin GEORGE, ai Aiwab-ainau ai Bobaiyatotin, nunuan e-itotorai-on (iai an agir i-n-sagob) ainaubag bomemedevim duran ba, i-u-nuen: wei an agir engon ba (am baiaiwab aurin e-mama-on, a-n-inonot tiwag) a-n-iagirai tiwag, a-n-kakafai, a-n-katutum fonan a-n-boai, matamui, aurim, am Dur babaimomogin am baifofor ba, nana; Iesu Keriso ai Badai, Om Ayu Usinkakafotin ba mat, O-mama o-b-iaiwab, God Kaitamom, wantoan. Amen.
COLLECT. Wasag-obin usinkakafotin.
EPISTLE. N. Usinkakafotin an wasag-obin.
Wasag-obin si gayam Kaptia ( ) Uar ( ) e-bosoruf.
Wasag-obin ainau. Duran aurim God.
Wasag-obin gibui. Bada a-b-ikakaivim.YAU God Kaita a bitutumai, Taman Faiwarin maiau, Safam, tafanam ba, abiabi rererebai fofotanai ba fourisotin.
Bada kaita ba Jesu Keriso, God Natun kaikas, tafanam engon momo Tamanai i-matar, God God aurin, Ratafin Ratafin emon, God bag God aurin, I matar, men si-fourai, Taman mat asi yabin kaita, On abiabi i fouris: Ot sabu aurit, ot baiyawasit mes ba, safam emon i-sur, Ayu Usinkakafotinai Mary matafin aurin usin i-boai, I-ififi, Pontius Pilate an rai ot aurit sinabai, I-iyababan si garob, Ra baitonin i-misir men Gayam nana. Au safam i-gae, Taman asumaiauai e-mamair. I-n-nat men er kudidir yawasis rabobis ba baitetemis mes. An baiaiwab er kamfou.
Ayu Usinkakafotin a bitutumai, Bada Kubai-yawasotin ba, Taman auriu Natun aurin ba e-gat on. On se-kwakwafirai se-b-iduranim. Taman Natun mat, Aubairuruotin awasi i-au on. Yau Ekalesia kaita, katoliko, Baiyoyob a-bututumai. Bapataito kaita bokomas rubonis mes a-kuku-rereb. Rabobis asi misir-men a-momosin. Tafanam e-nat on, an yawas on eb. Amen.1. Ami ratafin sabu matasi i-n-tagawai, nana ami bobo obis si-n-iten, Taman safamai e-mama on si-n-ifain. Mt. 5.
2. Men orot engou yau e-auureu, Bada, Bada, safam an au Baiaiwab i-na-r; ab Tamai safamai e-mama on an gogoi e-fofour on. Mt. 7.
3. Abiaifan sabu aurim si-na-four o-gogoi, nana mom auris e four; on min Baifofor Bobairuruotis ba. Mt. vii., 12.
4. Zacchaeus i tawar, Bada aurin i au, e itai Bada, noau turin baiabis auris a iten; ai orot iafan iafan emon fetag a aufoforai, baibatin nana a itenmeu. Lk. xix., 8.
Baisiwar dudur Bayoi.
Bread wine ba priest imasi aurim a siwar, Keriso usin An tar ba si n matarai on mes. Nunuau a item, on e fourai Jesu nunuau nanaba, kitumin, kakatumin, bosisir bonuin, aurim turau aurin eb.
Bada au bokakaf engon Jesu Tar obinai e sosouen, e matafiu e kakafeu, basit Ekalesiai a ni faim. Durau Taman, Natun, Ayu Usinkakafotiu auris, anai nanaba: ari on eb i na ma wantoan. Amen.
Keriso An Ekalesia engon nin tafanamai e-b-io on aurin ta n bayoi.
GOD Faiwarum maiau, wantoanmanim, Am Baiyoyob usinkakafotiu awanai u-ibebeyei sabu engon auris a-t-bayoi, a-t-kubaifefeyan, a-t-ikakaiw; A-kakatutum a-b-ifefeyanim e-kaberei tiwag [ai siwar ai sirifu be e boen,] atosi ai bayoi e-tatam, Am baiaiwab Obinmaiau aurin, a-yatet on; a-b-ifefeyanim dur-maiau, baitayo, baitono ayubis Ekalesia engon e-babainriu memen; E-four, engon Wabim usinkakafotin an dur-maiau si-n-nosin rere, baitayoai, God an bosisirai ba si-nama: A-b-ifefeyanim eb Aiwab-ainauan, Aiwab, Bobaiatotis Christians engon e-iyawasis, e rufafares; am Agir GEORGE ai aiwab-ainau an babaton; on bobo-obinai nuatai i-n-bobaiatei: E four an Baiabin engon, engon on gibunai se-b-iaiwab on ba, sabu men si-n, nosis, si-n-itetem bag, fofour-komasin sif komasin ba, fasisi si-n-imakies mes, am bobo-bag maiau, ya-obin ba si-n-botau mes. Safam-Tamai, Bishop sabu-kaifarisotis ba engon yawataf e-ites, asi bobai asi baibebeyi ba, am Dur-maiau yawasin ba si-n-yobai, am Sacrament usinkakafotis, ra obinai si-n-raram tiwag: Am sabu engon am yawataf safam emon e-ites; ato baitatai nin se-mama on an babaton; nana er nunuas tafomis kakaf obinai, am Dur usinkakafotin si-n-tatam si-n-boai; asi ra engon bobo-momoginai, botiwagai ba, si-n-iagirem bag.
Wei a kakatutum kwakwan a-b-ifefeyanim am moaobinai, Bada engon e-kubainunubes, e-ikurufanis, ato ra dinonai, yas si-komas, yas se-baban, si-gomar, si-sauwau, ai abi tani e-b-iragites on. Wabim usinkakafotin a-b-ikakaiwai eb, am agir engon auris am baitutumai am beruai, ato yawas si-neseir on; a-b-ifefeyanim yawataf u-t-itel, au fotas momogis a-t-igibubunues nana, osa mat, am baiaiwab safam emon a-n-raram. Ato e-four, Tamai, Iesu Keriso aurin, ai Rauber ai Basunorot kaitamom. Amen.
¶ Namon Priest Baitaye usinkakafotin boin mes si-nat on i-n-auures,
OMI dur-maiau, ami komas auris, yam o-b-ikitaburen tiwag, ami sabu mat bosisirai moatotorai ba, o-mama, yawas bobon fourin mes o-aubaisas, God an baifofor o-n-gububunues, ari namon an et usinkakafotisi o-n-bibib; baitutumai wo-kufoforen, ato Sacrament uskinkakafotin kubainunubum mes, wo bo; God faiwarinmaiau aurin, wo-katutum wo-yatet, wo-tafom sindam wo-ro.
Baiyatet.
GOD Faiwarim-maiau, ai Bada Iesu Kerisop Taman, Abiabi fourisotim, sabu engon baitetemisotim; ai bokomas sigaraha ai fofourkomasin ba, a-kakason, auris a-totou, weir rara, fetag fetag a-fouren on, nosai, durai, bobai ba, am wasekakair obin-maiau aurin, a kubairaragem basit auri yam i-kukurur yam i-tatab. Wei yai-a-ikitabiren tiwag, ato ai sif-komasis auris yai se-baban kwakwan; a-no-nosis yai-si-komas; asi bit i-rat kwakwan. E-kaberei, e-kaberei, Tamai kaberitim maiau; Natum ai Bada Iesu Keriso aurin, engon nauene a-bo on auris e-iboboni; e-four, ari namon wantoan a-n-iagirem a-n-kubaisisirem yawas bobonai, Wabim baifain mes duran mes ba Iesu Keriso ai Badai. Amen.
Bairufan.
GOD Faiwarim-maiau, safam Tamat, an kaber gagaminai, yas se-b-ikitabiren titiwag baitutum maiauai aurin se-mamatabir on, bokomas baibuburis i-aumatanis; E-kaberem; + e-inot-burem ami bokomas engon auris e-nafafarem; momogin engonai e-ifaiwarim e-iwaniem; yawas wantoan aurin e-boem; Iesu Keriso ati Badai. Amen.
¶ Namon Priest i-n-au.
Dur kukubainununis wo tatam, Baiyawasitotin Keriso e-auures, on aurin se-mamatabir bag on.
AURIT wo-nat, engon o-bobokwakwan ami bit si-rat on, yau a-n-iyawasim. Mt. 11.
God nana sabu i-bosisires, Natun kaikas i-ites, iaiwat i-t-nosin, men i-t-fufun on mes, ab yawas wantoan i-t-boai. Jn. 3.
Paul Usinkakafotin i au on eb wo tatam.
Ato dur-maiau, basit orot engon si-t-boai, Keriso Iesu au tafanam i-nat, bokomasotis baiyawasis mes. 1 Tim 1.
John Usinkakafotin i au on eb wo tatam.
Orot i-t-bokomas mes, ati Basunorot Taman aurin e-mama; taon ati bokomas asi moayayabar. 1 John 2.
¶ Namon Priest i-n-au men, i-n-au,
Nunuam wo-bogae.
Baiafot. Bada aurin a-bogae.
Priest. Ati Bada God ta-n-ikakaiwai.
Baiafot. Basit obin nana ta-ta-four.¶ Namon Priest Bada am Kem aurin i-n-ikitabir i-n-au,
BASIT, rutotorin, ai bobo bag, wei ra engon, au me au me, a-t-ikakaivim Bada *[Tamai Usinkakafotim]. Faiwarim maiau, God Wantoanim.
* Atosi dur "Tamai Usinkakafotim" Trinity Sundayai si-n-ikirir.
[Nio dur-bag rai gagamis auris]. Om aurin, Angels, Archangels ba mat, satam an kuayo engon mat, Wabim duran-otin a-bomomorai, a-b-igagaminai wantoan a-b-ifaim, a-au, Usimkakafotim, usimkakafotim, usimkakafotim, Bada God Sabaoth aurin, safam tafanam ba duram si-bonu: durau aurim, Bada aietun-ene. Amen.
Baimomogin On + Bada Wabinai i nat: Hosanna aietunene.
WEI men a-b-imakair, ato am Kem aurin a-nat Bada kaberotim, taoi ai bobaibasit a-b-itu-tum, ab om kaber sigaraba gagamis ba. Wei men basit moso am Kem babanai a-t-on mes. Ab om Bada kaitamin, om am fofour-rara u-t-taber: On aurin e-fouri, Bada moatotorim, wei Natun af Iesu Keriso bion a-n-an, an tar a-n-toman, nana usi komasis on usinai si-n-gumidar, ayubi on an tar momogin fafayai si-n-soen, wei on amonai wantoan a-na-ma, on eb wei amoii. Amen.
Ayu Usinkakafotin aurin e-bayoi i-n-sur, Bread Wine ba i-n-ikitabir Iesu Usin tar ba i-n-matar. Nanaba e bayoi,
GOD Kaberotim maiau, kebor mamui auris e-sirir, Am Ayu Usinkakafotin ato Wayo aurin e-iafar, ato Bread Bada an Usin i-n-fourai, ato Wine Bada an Tar. Amen.
Baiwar Bayoi.
GOD Faiwarim-maiau, safam Tamai, am kaber samisaminai, Natum kaikas Jesu Keriso u itai, nabai i ta rab, wei baitotoboni men mes: On nan (an sirifu kaita taon ra-kaitamom i kutetai) Nabuan, Sirifu, Wayo tutufin, matafin, obin, i four, tafanam engon an bokomas auris; ato an rabob momogin fafa an Not kikitin an i yein, an wasag-obin usinkakafontinai i-ifoforet, ta-t-kukutan ato i n nat men;
E tatami, Tamai, kaberotim, wei a katutum kwakwan, a-b-ifefeyanim; E-four wei atosi am fofour Bread Wine ba, a-na-bo, Natum baiyawasiotim Iesu Keriso an i-yein nana, an rabob an baikokosoar nosis mes, on Usin an tar ba, babaimomogis fafa a-n-raram:
Fom kaita-min si kasair nan Bread i-bo; i-ikakaiw weie, i abaseseb, an baiyoyob i-ites, i-au, Wo bo, Wo am, ATO USIU AURIM SI-ITAI ON: ATO WO FOUR, YAU NOSIU MES. Nanawat si-am, i sauwar weie, Vig i boai; i ikakakiw weie, i ites, i au, Engon ato wo-toman; ATO AU TAR AUMATAN BOBON AN TAR OMI SIGARABA BA AURIM I-DEBUR ON BOKOMAS RUBONIS MES; ato wo-four, o-n-toman nan, Yau nosiu mes. Amen.
E bayoi namon.
Tamai Kaberotim maiau, wei a katutum, a-b-ifefeyanim, Natum Iesu Keriso aurin ato wayo usinkakafotin e bi momoginai, e bo, aurin a oto on, duduram, duram mes, taoi auri yawataf engon. Am Ekalesia Katoliko e bi momoginai, ai Bishop, Priests engon ba, Bokomasoitis, dur-seseirotis, tafanam engonai, e yakitabires; sauwauotis e bi yawasis, amon-babanotis e kubainunubes. Iesu Konari, Om tafanamai U ma ato baimomogis engon U ites, ai bayoi e tatam: e bi momogineu, tuturau [nin wabis e baton] eb, engon baitutum bag si kaifarai, ba.
Bayoi rabobis mes.
E nonos eb Bada, Am agir-orot am agir-jever ba (wabis e baton) ainau si gat baitutum baifafaroai, tuf an enbuburai si iarir. Auris, oai engon auris ba. Kerisoai si iarir, e four auris Bada, kufafar en efan, ratafinefan, tuf efan ba, a bi fefeyanim. Kaitamin Keriso ai Badai. Amen.
Au Iesu nio u ma a bitutumai a kwafirem:
Au Iesu, aurim a bi-amar, e kabereu:
Au Iesu a bosisirem, au bokomas e notbur.Bada an Arini, tafanam an bokomas u bi nae, e kaberei.
Bada an Arini, tafanam an bokomas u bi nae, e kaberei.
Bada an Arini, tafanam an bokomas u bi nae, Am tuf e four auri.¶ Au altar u n nar, sindam kaitamomai e rou, Sacrament Baimomogin u bisarabon weie, e au,
Bada yau men basit au goai u ta rui: baise dur mom e au, ayubiu i n yawasai.
Bada, e nat auriu, e igumidareu.
Bada, e nat auriu, e bi yawasiu.
Bada, e nat auriu e bi faiwareu.¶ Usin totorai sindam e ro, Sacrament boen mes.
Dur itin mes,
Paten. + Ati Bada Iesu Keriso Usin, om weinem si itai on, usim ayubim ba, yawas wantoan aurin, e kufafaris.
Ato e bo e am Keriso weinem i rabob nosin mes, nunuamui on e ibayu nosai baikakaiw mat.Chalice. + Ati Bada Iesu Keriso an tar, om weinem i yeir on, usim ayubim ba, yawas wantoan aurin, e kufafaris.
Ato e toman Keriso an tar weinem i yeir nosin mes, e ikakaiw.¶ E bo Weie, e gat, nunuamai God e bi kakiw, Iesu, om mat i mat. Amomai i ma. E au,
Au God, om momogin maiaiu:
Au God, om gagamin maiau:Yau mat U ma, amonai u ma, men a item, ab u mian, a sagob. Taom U iteu, tau a item. Iesu yau mat e ma wantoan. Usuikakafotiu a ta ma. E ibaisiu. Mamab aurim a na ma, e ibebeyeu; mamab aurim a na four, mamab a bosisirem, mamab aurim a ta rab. Angels usiskakafotis safamai si duranim, basit tafanamai a t duranim.
E nanawaieu, yawataf e iteu a n kakafai a na rat, aurim nosin ba.
Anima Christi.
Keriso Ayubiu, e kakafeu,
Keriso Usin, e iyawasiu,
Keriso Tar, u siu e ririm,
Serau Keriso sesebin emon e soueu,
Keriso Yababan, e faiwareu,
Iesu Obim, e tatameu,
Am Afasi, e ibuniu,
Sab Om emon abi e bi gamoganiu,
Ragit yan-momo aurin e fafareu,
Rabob an erai e yoreu,
Aurim a n nat e auureu,
Usinkakafotis mat a n ifaim, on aurin
Wantoan, wantoan. Amen.Bada an Bayoi.
TAMAI, Safamai e mama on, Wabim se kakafai, Am Baiaiwab e nat. Am gogoi se four, tafanamai safamai nanaba. Atoari ai rara siu e itei. Ai bokakaf auris e iboboni. Maragan auri se bokakaf on a b ibobonis. Au rutobon abi e b inanawaii; Ab komas emon e nafafarei. Baiaiwab, Faiwar, Duran ba. Om noam wantoan. Amen.
Sirifu an Bayoi.
BADA Safam Tamai, wei am agir katutumi a b iamari babag om; tamas asi moa-obin nana, am kaberai ato ai wayo baifain baikakaiw ba u t boai; a kakatutum kwakwan a b ifefeyanim u ta four, Natum Iesu Keriso an sif ibosi rabobai ba, an tar baitutumai ba, wei am Ekalesia engon ba ai bokomas rubonis, a n sagai, an baikokosar, an bobaimomogin fani engon ba. Nin, Bada taoi, ayubi, usi ba, aurim a kukutetei a b item, atiyi wayo usinkakafotiu yawasin ba aurim mes; a kakatutum, a b ifefeyanim, wei engon, ato Baitayo usinkakafotin a raram on, am yawatafai am aubaimomoginai safam emon ba, a n bonu. Wei men basit ai bokomas sigaraba auris, abi wayo aurim a t kutet mes, ab a b ifefeyanim ato ai bobo bag ai baiagir ba e boen; men ai sif-obis a n ifofonen, ab ai seir e iwawanai, Iesu Keriso ai Badai; onai, on mat Ayu Uskinkakafotinai an Baitayoai, bomemedeu duran ba, engon aurim, Tamai Faiwarim maiau, se ma wantoan. Amen.
¶ Namon si n au ai si n kwarer.
Gloria in Excelsis.
DURAN God aurin aietunene, tafanamai tuf orot auris kubaisisir. A b ifaim, a aubaimomoginem, a kwakwafirem, a b iduranim, a b ikakaiwim duram gagamin aurin, Bada God, safam Aiwab-ainau, God Tamai, Faiwarim maiau.
Bada, Natun kaikas Iesu Keriso; Bada God, God an Arini, Taman Natun, tafanam an bokomas e boboen on, e kaberei. Tafanam an bokomas e boboen on, e kaberei. Tafanam an bokomas e boboen on, ai bayoi e tatam, God Taman Asumaiauai e mamair on, e kaberei.
Ekesim usimkakafotim; ekesim Bada; ekesim Keriso, Ayu Uskinkakafotin mat, aietunene bag o mama, God, Taman, an kudidirai. + Amen.¶ Namon Priest (ambin ato Bishop i ta ma mes) i n ikirires si n an ato Baimomogin i n au,
¶ Baimomogin mes unin e tur dogaramai nab e tein,
God an tuf, sagob engon e b i niserai on, nunuam yam ba e rafes, God Natun Iesu Keriso ba, asi sagobai asi bosisirai ba:
God Faiwarin maiau Taman, Natun, Ayu Usinkakafotin an baimomogin + aurim e ma e mian wantoan. Amen.
¶ Baimomogin weie Priest Usin Tar tuturin i ma, i n am-toman, om u n bayoi nana.
God, Baimomogin on e ma:
An Wabin Usinkakafotin baimomogin:
Iesu Keriso God bag, Orot bag, baimomogin:
Iesu Wabin baimomogin on:
Iesu Sacrament Uskinkakafotinai
Altar aurin baimomogin.¶ Priest Bayoi-goa i i kirir, men garawat e gat ab God e b ikakaiwai an obinin aurin, nana:—
V. God an tuf nunuamai e itagawai. Alleluia.
R. An Ayu aurin amomui i mimiam. Alleluia, Alleluia.V. Ai Bada, imas si boem men wantoan si n bokakaf moam-obinai e four auris: giburus Om u kakafes men aifan abi basit aurim si n au; nunuan menan u rui am bosisirai i na ma wantoan.
Baiyawasotim ai basi engon e safam, matafin, faiwarin, a na ma, rakaita a n iagirem tiwag, duram duduram aurin. Amen.
+ Rabobis ayubis baitutumis God kaberai, tufai e b iarires.
¶ Namon ai u gogoi, nana:—
PSALM 150.
1. Bada wo bi fain. God e ifain an efau kakafaiin aurin: God e ifain safammai an kututu aurin.
2. E ifain on an sif faiwaris auris: E ifain on an gagaminin obinin nana.
3. E ifain on daur fonanai: E ifain on geforai kaugegai ba.
4. E ifain on sagerai baisauai: E ifain on uramtatafai orofai ba.
5. E ifain on tatafai: E ifain on tataf daurinai.
6. Fofour engon se iaratain Bada ta n ifain.Bada wo bi fain.
Taman, Natum, Ayu Usinkakafotin ba: auris duran e ma.
Anai nanaba: ari on eb i na ma wantoan. Amen.NUNC DIMITTIS
Bada am agir tufai e iafar: am dur nana.
Am baiyawas: matau si it, on mes.
U botitiwag on: Dam engon magisi.
Ratafin bariau i n tagawaiis mes: am sabu Israel duras mes.
Taman, Natun, Ayu Usinkakafotin ba: auris duran e ma.
Anai nanaba: ari on eb i na ma wantoan. Amen.Fifirig ton asi kwarer ta n kwarer: on se kwaaer Bada baifain mes wairaf efanai.
Bada, e kaberei,
Keriso, e kaberei,
Bada, e kaberei.TAMAI, Safamai e mama ou
Wabim se kakafai.
Am Baiaiwab e nat.
Am Gogoi se four tafanamai safamai nanaba.
Atoari ai rara siu e itei.
Ai bokakaf auris e iboboni.
Maragan auri se bokakaf on a b ibobonis,
Au rutobon abi e nanawaii;
Ab komas emon e nafafarei.V. Am fofour engon si t ifaim Bada.
R. Am usinkakafotis si n ikakaiwim.
V. Am usinkakafotis duranai si n sisir.
R. Asi ireai si n sisir.
V. Men auri Bada, men auri.
R. Ab wabim aurin baifain mes.
V. Bada au bayoi e tatam.
R. Au tou aurim i t geg.Ta n bayoi.
GOD, fifirig ton auris wairaf waimemeran u kufafaris, kaberai e four bokomas waimemeran, wei, am agir, auri men si n tutu.
BADA ai bobo engonai e nanawaii, moam obinai, am baibais wantoan e iafarei, ai fofour engonai Omai se bosuruf, se bobo, se sauwar. Wabim usinkakafotin duran mes, kaberai yawas wantoan a n boai weie. Amen.
BADA, wei a b ifefeyanim, ai bokomas waimemeran kufafarei mes yawataf e itei nanaba Laurence baimomogin faiwar u itai an yababan wairaf i sowarai, Iesu Keriso ai Badai. Amen.
+ Yawataf ati Bada Iesu Keris emon, God an bosisir, Ayu Usinkakafotin an baitayo, ot er engon aurit si na ma wantoan. Amen.
BAIYATET AN BAYOI.
Baiyatet aiyet.
O au God baiyatet obin a ta four, e ibaisiu. Au bokomas a n nuen, a n gatur, e ibaisiu. Yau i n baban auris, nunuau i t tari, men a n foures men. Priest a n kason e ibaisiu.
Am bokomas auris e nuen nana.
Ra biam aiyet weie u yatet?
Rorob u yatet bokomas fani men u kason bait?
Au baimakiain a bo bait?
Rafufur, fomene, fom, a bayoi bait?
Men basi a dudures bait?
Dur komasin a au bait?
Taparora aurin men a n an bait?
Bayoi goai a serer ai a kakafun bait?
Tamam, Ayom, ai Baibebeyaiotis asi fonas a seir bait?
A bi onen bait?
Yau i tatab bait?
A bainau bait?
A isigo bait?
A kutabi bait?
Orot ta ai jever a auures si t bokomas bait?
Abifan ta i yen u t kason.GOD on momogin maiau, On i fourem, ayubim, usim, abiabi engon noam i item. On usinkakafotin yantotorotin, bokomas i kusiwei. Safam i four sabu momogis weines. On i bosisirem kwakwan. Weinim orot i matar, nabai i rabob, imasi aisik se yen, aisik nigir Uninai se yen, momogin u na rat, au safam u n an, baibaisim mes ba. Meyan u bokomas On God momogin u bi babanai, on iafan i bosisirem.
Atoari am bokomas aurin yam e baban, nunuam e four nana, men u n bokomas men: e au nana:—
Au God, yau i baban kwakwan a babanim, Om momogin maiau on aurin; men a n bokomas men.
Au God, men meyan a t bokomas a gogoi, on men e kubaisisirem on aurin. Au God a bosisirem, a gogoi men meyan a n bokomas men.
Tamai, Safamai e mama on.
Wabim se kakafai.
Am Baiaiwab e nat.
Am gogoi se four,
Tafanamai Safamai nanaba.
Atoari ai rara siu e itei,
Ai bokomas auris e iboboni.
Maragan auri se bokakaf on a a bi bobonis.
Au rutobon abi e nanawaii.
Ab komas emon e nafafarei. Amen.¶ Namon au Priest e gat yatet mes bobo engon e kason men kaitamom e ibuni, dur nanaba:—
GOD faiwarim maiau, aurin a yatet, Mary Usinkakafotin aurin, usinkakafotis auris, om aurim tamau ba; yau a bokomas kwakwan, nosai— durai — boboai ba (rorob a yatet gibui a bokakaf a obareu, a bokomas .... [nio e baton]) osi auris, fani ari men a nos tiwag, nunuau i baban, basit a na four a aumatan; om a itetem baimakiain, dur, bairufan aurin. God Taman, Natun, Ayu ba a bayoi, si n kaber, si n notbureu, om tamau e bayoi weineu.
¶ Namon Priest an dur e tatam tiwag. Priest an dur i sauwar weie abifan i auurem u na four e nonosin,
Priest bairufan dur,
ATI Bada Iesu Keriso, on an Ekalesia aurin kututu i iyein, bokomasotis engon yas si kitabir bag si bitutumai bairurufanis mes; an kaber gagamin aurin am bokakaf e notbures. An auwabiu i iteu aurin am bokomas engon emon a rufanim + Taman, Natun, Ayu Usinkakafotin Wabisi. Amen.
¶ Namon God e bi kakaiwai nana:—
AU God a bi kakaiwim, baiyatet aurin a nat au bokomas engon u notbures. E ibaisiu, wantoan a ana four bukaisisirem mes.
Iesu, Om u bosisireu nab an rabob aurin min, nunuau engonai a n bosisirem e ibaisiu. Au God a bosisirem; a t bosisirem baifufu, e ibaisiu.
Namon am baimakiain e bo, e four tiwag basit e mama wantoan weie.